Marc habitescha en ina cuminonza da viver divertenta e gauda la veta da marcau. Ses geniturs habiteschan per cletg lunsch naven, ch’ ei intervegnan pauc ni nuot dalla veta dil fegl gagliard ch’ ei signada da far parties. Els crein aunc adina che siu fegl studegi, per saver cuntinuar la tradiziun da famiglia e surprender in di l’ advocatura dils geniturs. Marc denton siemia d’ ina carriera sco actur da teater. Ord quei motiv absolvescha el dapi onns ina scola d’ acturs.
El habitescha ensemen cun l’ emploiada da banca Andrea, cul metschafadigia Ingo e cun Mirco, ch’ ei fetg sengaschaus ella lavur soziala. Tuts treis pon buca pli parter il misteri cun Marc, cunquei ch’ els vegnan adina sfurzai da dir manzegnas enviers ils nobels geniturs da Marc che finanzieschan en verdad la scola d’ acturs enstagl il studi da jura. Ultra da quei cugliuna Marc sia amitga Dani che vegn ord ina famiglia d’ acturs. Ed aschia succeda la pustracca: In di stat il bab da Marc suenter ina crisa da lètg avon porta. La catastrofa entscheiva, mo il niebel signur advocat ei strusch pli d’ enconuscher el ravugl dils giuvenils….